Partia Demokratike ka anuluar mbledhjen e grupit parlamentar, ndërsa deputetët e saj janë drejtuar drejt protestës para Ministrisë së Arsimit në Tiranë, ku nuk janë mirëpritur nga një pjesë e studentëve dhe protestuesve.
Kreu i PD-së, Sali Berisha, nga selia e partisë, i ka kërkuar kryeministrit Edi Rama dorëheqjen e menjëhershme dhe krijimin e një qeverie teknike. Ndërkohë, disa deputetë demokratë janë paraqitur në protestën e studentëve, por prania e tyre ka shkaktuar reagime.
Deputetët Belind Këlliçi dhe Eno Bozdo janë përballur me kundërshtimin e protestuesve, të cilët u kanë kërkuar të largohen nga tubimi. Më pas, edhe deputeti Edi Paloka është afruar për të komunikuar me studentët, por është pritur me të njëjtin reagim.
Protestuesit kanë refuzuar praninë e përfaqësuesve politikë, duke brohoritur: “Rama n’burg, Berisha n’burg”, në një mesazh kundër të dy drejtuesve politikë.
Ndërkohë, protesta para Ministrisë së Arsimit ka vijuar mes tensioneve dhe përplasjeve të herëpashershme me policinë. Reagimi ndaj deputetëve të PD-së vjen në një moment kur studentët dhe protestuesit vijojnë tubimin, ndërsa prania e politikanëve në protestë është shoqëruar me kundërshtime nga një pjesë e pjesëmarrësve.
