Prokuroria e Tiranës përfundoi hetimet për vrasjen e Aurelio Dervishit, në mars të këtij viti dhe dërgoi për gjykim dosjen penale ndaj Frensis Shehut dhe 3 të miturve me iniciale Sh.H., B.Sh dhe I.I.
Ndaj tyre rëndon akuza e “vrasjes me dashje e kryer në bashkëpunim”.
Nga hetimet rezultoi e provuar se rreth orës 20:45 pm të 31.03.2024 personat e arrestuar kanë parë duke lëvizur mjetin tip ‘Audi’ me të cilin lëvizte viktima, Aurelio Dervishi me miqtë e tij dhe një vajzë që dyshohet se kishte pasur lidhje me parë më një nga bashkëpunëtorët në vrasje Frensis Shehun.
“Për shkak të xhelozisë e duke menduar se po qeshnin me të, shtetasi F.Sh. i ndoqi nga pas me makinë duke i prerë rrugën. Në grindje e sipër, ai ka kërkuar nga shoku i tij, i mituri Sh.H., të nxjerrë thikën dhe të qëllojë viktimën. Ndërsa bashkëpunëtorët e tjerë janë rrahur me grushte me viktimën dhe shokët e tij”, njoftoi prokuroria.
Aurelio Dervishi rezultoi sipas ekspertimit mjeko-ligjor se humbi jetën si pasojë e shokut hemorragjik traumatik nga plaga e marë në kraharor.
