Dy udhëheqës të lartë të grupit palestinez Xhihadi Islamik, i cili është shpallur organizatë terroriste nga Shtetet e Bashkuara, janë vrarë gjatë sulmeve ajrore të realizuara nga Izraeli në Siri gjatë javës së kaluar, njoftoi grupi më 16 nëntor.
Xhihadi Islamik, që lufton krah Hamasit – një tjetër grup palestinez i cilësuar si organizatë terroriste nga SHBA dhe Bashkimi Evropian – kundër Izraelit në Rripin e Gazës, tha se Abdel Aziz Minawi dhe Rasmi Yusuf Abu Issa u vranë në sulmet ajrore të së enjtes, të cilat goditën zyra dhe banesa të liderëve të grupit.
Agjencia e lajmeve AFP raportoi se gjatë sulmeve në zonën e Kudsajës, afër Damaskut, humbën jetën dy udhëheqësit dhe një anëtar tjetër i Xhihadit Islamik.
