Një komision i posaçëm pranë Drejtorisë së Përgjithshme të Burgjeve pritet të mblidhet nesër, e shtunë, ora 10 për të shqyrtuar kërkesën e Alfred Belerit për leje, me qëllim që të udhëtojë drejt Strasburgut dhe të betohet si deputet i Parlamentit Europian.
Mediat greke kanë raportuar ditën e sotme, se Belerit i është miratuar leja, por zyrtarisht Burgjet thanë për VNA se ende nuk ka një vendimmarrje në lidhje me këtë çështje.
Rasti i Belerit është precedenti i parë, kur një i dënuar me vendim të formës së prerë kërkon leje me qëllim që të udhëtojë jashtë vendit e të betohet si eurodeputet. Më herët, ai fitoi garën në zgjedhet vendore të 14 majit 2023, duke u zgjedhur si kryebashkiak i Himarës, teksa ndodhej në paraburgim nën dyshimet për shitblerje votash.
Beleri tashmë është dënuar me 2 vite burgim për korrupsion zgjedhor dhe KQZ i ka ndërprerë mandatin e kryebashkiakut. Himara shkon në zgjedhje më 4 gusht dhe ne garë për të marrë "frerët" e bashkinë janë Vangjel Tavo nën siglën e PS-së e Petro Gjikuria i propozuar nga Vangjel Dule i PBDNJ-së.
