Në kulmin e sezonit turistik, mbi 80 ndërtesa u shembën në Theth me urdhër shtetëror. Ndërsa një vit më parë përshkruhej nga kryeministri si “kartolina e mrekullisë shqiptare”, sot etiketohet si “tokë e xanun”. "Kjo gjuhë përçmuese, e përdorur edhe nga bashkia Shkodër, rikthen në vëmendje paragjykime të vjetra ndaj banorëve të veriut"-thuhet në reagimin e Diasporës.
Sipas tyre banorët e Thethit nuk janë “uzurpatorë”. Ata janë autoktonë, që jetojnë në këtë zonë prej shekujsh. Vështirësitë për të pajisur me dokumente pronësie bazuar nga ligji 7501, shpallja e zonës Park Kombëtar që në 1966, dhe më pas Qendër Historike, duke e bërë gati të pamundur marrjen e lejeve ndërtimore.
Megjithatë, banorët investuan në turizëm me mundësitë që kishin, duke kthyer Thethin në një destinacion evropian, ashtu siç e cilësoi vetë qeveria një vit më parë. Premtimet për zgjidhje ligjore dhe falje gjobash janë harruar, ndërsa është zgjedhur rruga e shembjeve pa zgjidhje.
Diaspora për Shqipërinë e Lirë kërkon një trajtim të drejtë dhe respekt për komunitetin autokton të Thethit, që nuk duhet të sakrifikohet për propagandë politike apo përballje sezonale me “ligjin”.
