Carlos Garcia Badias është zyrtarisht trajneri i ri i Flamurtari Football Club. Ekipi i vlonjatëve i është besuar 41-vjeçarit spanjoll, i cili do të drejtojë për herë të dytë në karrierë një ekip si trajner i parë.
“Mirë se vjen në familjen e madhe Kuqezi të Flamurtari F.C.”, ka shkruar klubi vlonjat në rrjetet sociale, duke i uruar mirëseardhjen trajnerit të ri.
Carlos Garcia e ka nisur karrierën në stafin teknik të Dangdai në Kinë si ndihmës-trajner. Në vitin 2022, ai mori drejtimin e TLV Bat Yam, që mbetet deri më tani ekipi i vetëm ku ka qenë trajner i parë.
Më pas, karriera e tij vazhdoi në Serie A, ku u bashkua me Udinese si asistent teknik, ndërsa eksperienca e fundit para Flamurtarit ka qenë në SHBA, si ndihmës-trajner te Chicago.
I lindur në Barcelonë, Garcia ka pasur një karrierë të pasur si futbollist, duke luajtur me skuadra si Espanyol, Almeria, Real Betis, Maccabi Tel Aviv dhe Alanyaspor.
