Kryetari i Partisë Demokratike, Sali Berisha, duke folur për arestimin e Erion Veliajt në emisionin “Opinion”, është shprehur se kryebashkiaku është një nga hajdutët më të shpërfytyruar në historinë e Shqipërisë.
Pavarësisht se e akuzon Veliajn si një nga hajdutët më të mëdhenj në vend që ka vjedhur 130 milionë euro me inceneratorin që nuk ekziston, Berisha tha se nuk është dakord që të dënohej me burg, por do mjaftonte arresti shtëpiak.
“Arrestimi i Veliajt, kemi 44 javë që protestojmë tek Bashkia, arrestim i vonuar. Veliaj në historinë e këtij vendi, një ndër hajdutët më të shpërfytyruar. 130 mln Euro djegësi i Tiranës, nuk ekziston nam as nishan.
Veliaj u bë problem botëror për djegësin dhe shumë gjëra të tjera. Mos mendo se nuk dinte Rama se po arrestohej. Rama e kishte lëshuar atë plotësisht, priste arrestimin e tij në Dhjetor. Nuk e donte arrestimin. Që Rama do të lante duart me Veliajn, unë e kam thënë. Veliaj nuk pranohej nga klani Rama si pasardhës i këtij klani dhe këtë Rama nuk ngurroi ta bënte të qartë. Nuk mund të them se ka qenë për arrest me burg, ka qenë për arrest të llojit të Ajolën, një arrest shtëpie” – tha Berisha.
