Ish-ministri i Shëndetësisë Ilir Beqaj, i cili po përballet me drejtësinë për aferën e sterilizimit, shënjestroi Gjykatën e Posaçme si të kapur politikisht dhe deklaroi se vendimet e saj i duartroket Sali Berisha e Albana Vokshi.
“Ndikimi është dukshëm politik, konformist, personal dhe shoqëror. Vendimmarrjen tuaj e ka duartrokitur si z. Sali Berisha ashtu dhe znj. Albana Vokshi, sepse ju keni mbështetur akuzat e tyre politike,” deklaroi Beqaj.
Në fakt, është për t’u çuditur se si ish-ministri i Ramës sulmon politikisht Gjykatën e Posaçme, ndërkohë që e njëjta gjykatë ka dhënë vendime të kontestuara publikisht edhe nga Sali Berisha. Madje, Albana Vokshi, që Beqaj përmendi sot në gjykatë, është një nga protestueset e rregullta në mitingjet që Sali Berisha thërret para derës së SPAK.
Me gjasë, mbrojtja juridike tashmë ia ka lënë vendin akuzave politike ndaj SPAK dhe Gjykatës së Posaçme si e vetmja mënyrë për të sajuar alibi përballë akuzave të drejtësisë.
Nëse SPAK apo Gjykata e Posaçme janë nën ndikimin e Sali Berishës, normalisht ai dhe familja e tij do të ishin të amnistuar nga drejtësia. Gjë që do të ndodhte nëse do të ishin edhe nën ndikimin e Edi Ramës. Akuzat e ndërsjella politike të PS-së dhe PD-së ndaj SPAK dhe Gjykatës së Posaçme qartë tregojnë pafuqinë e të akuzuarve për korrupsion (dhe jo vetëm), që në ditën e keqe të tyre thërrasin në ndihmë politikën dhe jo drejtësinë.
