Policia e Vlorës ka arrestuar autorin e dyshuar të vendosjes së tritolit në një lokal të pronës së familjes së Bledar Birçajt, i cili u ekzekutua me armë zjarri në vitin 2021.
Sipas njoftimit të policisë, ngjarja ndodhi sot rreth orës 14:00, në zonën e Xhamisë, ku u kap autori i dyshuar për shpërthimin që ndodhi pak ditë më parë në bar-kafenë në Lungo-mare. Autori, me inicialet B.M., 37 vjeç, është nga Vlora dhe i përket pakicës rome. Policia njoftoi gjithashtu se po punohet për zbardhjen e motiveve të ngjarjes.
Shpërthimi u regjistrua në orët e para të mëngjesit të 8 dhjetorit, dhe fatmirësisht, pati vetëm dëme materiale. Mësohet se autori ishte i maskuar dhe vendosi eksploziv me fitil. Pas aktivizimit të tritolit, ai u largua mes pallateve në zonën e Ujit të Ftohtë.
Vrasja e Bledar Birçajt
Bledar Birçaj u ekzekutua me armë zjarri më 10 maj 2021, teksa po udhëtonte me automjetin e tij “BMW” X5 në vendin e quajtur Bishti i Kalldrëmit. Ngjarja përfundoi me vrasjen e Birçajt, ndërsa dy persona të tjerë që ndodheshin me të, shpëtuan mrekullisht nga plumbat.
Dy autorët, të pajisur me kallashnikovë, e zunë pritë dhe qëlluan drejt mjetit që drejtohej nga Birçaj. Një prej personave që ishte me të, Granit Deromemaj, një oficer i policisë anti-drogë dhe shok i ngushtë i viktimës, shpëtoi gjithashtu nga plumbat.
