Pas më shumë se 12 orë kërkimesh në zonën e Selenicës, policia e Vlorës ka arritur të vërë në pranga një 44-vjeçar, i cili qëlloi me armë në gjendje të dehur, duke shkaktuar panik te banorët e zonës. Shtetasi, identifikuar si A.F., u arrestua pas një operacioni të gjerë, ku u sekuestrua dhe arma e zjarrit kallashnikov, e cila ishte e mbushur dhe e gatshme për përdorim.
Sipas njoftimit të policisë, ngjarja ka ndodhur mbrëmjen e djeshme në fshatin Brataj. 44-vjeçari, i dehur dhe pas një konflikti të çastit, u ka thënë autoriteteve se disa të mitur po e bezdisnin, çka e ka shtyrë të marrë armën dhe të qëllojë në ajër. Kjo ka shkaktuar frikë dhe panik te banorët dhe te fëmijët e pranishëm në momentin e incidentit.
“Shërbimet e Stacionit të Policisë Selenicë, në bashkëpunim me shërbimet e Komisariatit të Policisë Vlorë dhe Forcën Operacionale në DVP Vlorë, pas ngjarjes së ndodhur mbrëmjen e djeshme, kanë zhvilluar kërkime të pandërprera gjatë gjithë natës, në një terren të vështirë malor dhe pyllor. Si rezultat, sot në mesditë, u bë i mundur arrestimi i shtetasit A. F., 44 vjeç, banues në fshatin Brataj,” njoftoi policia.
