Policia e Fierit ka arrestuar një 20-vjeçar, i dyshuar si autori i zjarrit masiv që përfshiu fshatin Drizë dhe zonat përreth, duke shkaktuar dëme të konsiderueshme materiale dhe duke rrezikuar banesa.
Sipas Policisë, në pranga ka rënë shtetasi N. J., 20 vjeç, banues në Drizë. Ai dyshohet se më 5 korrik 2026 ka ndezur zjarr në tokën në pronësi të babait të tij për të djegur barishte, por flakët kanë dalë jashtë kontrollit dhe janë përhapur me shpejtësi në një sipërfaqe të madhe, duke prekur edhe disa fshatra përreth.
Për shkak të përhapjes së zjarrit, shërbimet e Policisë evakuuan 12 familje, banesat e të cilave u rrezikuan nga flakët.
Sipas autoriteteve, falë ndërhyrjes së menjëhershme të Policisë, zjarrfikësve, grupeve të Forcës Kombëtare të Sigurisë (FKS) – Njësia Fier dhe helikopterëve të Forcave të Armatosura, u bë e mundur shuarja e zjarrit pa pasoja në njerëz.
Policia vijon hetimet për dokumentimin e plotë të ngjarjes, ndërsa u bën apel qytetarëve të tregojnë kujdes maksimal dhe të shmangin çdo veprim që mund të shkaktojë zjarre, duke paralajmëruar se shkelësit do të përballen me ligjin. Gjithashtu, fton qytetarët të denoncojnë çdo rast të paligjshmërisë në numrin 112, duke garantuar anonimatin dhe reagimin e menjëhershëm.
