Mijëra qytetarë kanë nisur marshimin nga Sheshi “Skënderbej” drejt Kryeministrisë, në kuadër të protestës së 35-të kombëtare kundër qeverisë së drejtuar nga Edi Rama. Tubimi pritet të jetë një nga më të mëdhenjtë e zhvilluar deri më tani.
Gjatë marshimit, protestuesit kanë thirrur slogane të ndryshme, përfshirë “Rama jep dorëheqjen”, “Revolucion”, “Lironi çunat” dhe “Shqipëri e re”, ndërsa janë dëgjuar edhe thirrje kundër klasës politike në tërësi. Sipas organizatorëve dhe pjesëmarrësve, protesta ka bashkuar qytetarë nga e gjithë Shqipëria, si dhe shqiptarë të ardhur nga diaspora.
Kolona e protestuesve ka përshkuar disa prej rrugëve kryesore të kryeqytetit, ndërsa kërkesat e tyre kryesore mbeten dorëheqja e kryeministrit, lirimi i personave të ndaluar gjatë përplasjeve me policinë në protestën e së enjtes, si dhe ndryshime në sistemin politik.
Në protestë është vërejtur sërish pjesëmarrja e diasporës shqiptare, për herë të dytë në një tubim të zhvilluar në Tiranë, ku janë bashkuar me marshimin drejt Kryeministrisë.
