Ambasadorja e Izraelit në Shqipëri, Galit Peleg, ka reaguar ashpër ndaj flotiljeve detare që synojnë të çajnë rrethimin e Gazës, duke i cilësuar ato jo si misione humanitare, por si operacione propagandistike kundër Izraelit.
Reagimi i diplomates izraelite vjen vetëm pak orë pasi aktivisti shqiptar Baki Goxhaj, pjesë e flotiljes “Sumud”, mbërriti në Shqipëri, pas ndalimit nga forcat izraelite gjatë operacionit në ujërat ndërkombëtare.
Në deklaratën e saj, Peleg shkruan se imazhi i aktivistëve si humanitarë të guximshëm “shembet përpara çdo verifikimi minimal”, duke këmbëngulur se këto nisma nuk synojnë realisht ndihmën për civilët në Gazë.
Sipas saj, nëse qëllimi do të ishte humanitar, aktivistët do të përdornin kanalet ndërkombëtare të koordinuara për dërgimin e ndihmave dhe jo flotiljet që, sipas saj, synojnë “të prodhojnë imazhe” dhe të demonizojnë Izraelin.
“Flotilat nuk janë krijuar për të ofruar furnizime. Ato janë krijuar për të ofruar imazhe,” shkruan ambasadorja.
Peleg ngre dyshime edhe mbi financimin e këtyre organizimeve, duke pretenduar se pas tyre qëndrojnë rrjete të lidhura me mbështetës të Hamasit dhe qarqe që kanë mbështetur sulmet e 7 tetorit.
Në reagimin e saj, ambasadorja izraelite kritikon edhe figura publike europiane dhe aktivistë ndërkombëtarë, ndërsa përmend Greta Thunberg si shembull të një aktivizmi që, sipas saj, është kthyer më shumë në performancë politike sesa në zgjidhje reale.
Deklarata e saj vjen në një moment kur operacioni ndaj flotiljes “Sumud” ka shkaktuar reagime të forta ndërkombëtare, ndërsa aktivistët pjesëmarrës kanë denoncuar ndalimin dhe trajtimin nga autoritetet izraelite.
