Vetëm 24 orë ka zgjatur dashuria e opozitës me kryetarin e Kuvendit, Niko Peleshi, pasi një deklaratë vlerësuese e Gazment Bardhit mbrëmë në Parlament u përmbys sot nga Sali Berisha në konferencën për shtyp.
Si rrallë herë, Bardhi u shfaq mbrëmjen e djeshme në foltoren e Kuvendit me një ton falënderues ndaj Peleshit, duke vlerësuar rolin e tij për marrëveshjen e radhës mes opozitës dhe mazhorancës, që ishte për rregulloren e Kuvendit.
“Zoti kryetar i Kuvendit, dua të vazhdojë të jem edhe sot, i drejt dhe i vërtetë siç kam qenë edhe kur ju kam kritikuar, por sot dua t’ju falenderojë, për rolin tuaj konstruktiv që keni luajtur gjatë gjithë procesit parlamentar, për zbatimin e vendimit të Gjykatës Kushtetuese dhe ndrsyshimeve në rregulloren e Kuvendit, si dhe për përpjekjen tuaj të sinqertë për të krijuar kushtet minimale të një dialogu të thjeshtë mes mazhorancës dhe opozitës”, tha Bardhi.
Por respekti nuk zgjati shumë. Ditën e sotme, gjatë konferencës për mediat ku komentoi raportin e IBAR, Sali Berisha e kritikoi me nota tallëse Niko Peleshin, duke thënë se është kryetari i Kuvendit më qesharak dhe më kukull i një Parlamenti në Europë.
“Pra, Niko Peleshi del kryetari i Parlamentit më qesharak në Europë. Kryetari kukull i një Parlamenti në Europë, që votonte ligjet e kërkuara nga Bashkimi Europian pa debat, pa kontroll, pa asgjë”, tha Berisha.
Ky ritëm deklaratash nxjerr në pah ulje-ngritjet e “dashurisë” mes opozitës dhe mazhorancës, që në darkë gjejnë gjuhën e përbashkët me marrëveshje, ndërsa në mëngjes rikthehen te repertori i zakonshëm i përplasjeve dhe akuzave.
