Ish-deputeti i PD, Enkelejd Alibeaj, e cilësoi si “pazar politik” bashkëpunimin mes opozitës dhe socialistëve për reforma si ajo territoriale, zgjedhore dhe ndryshimet në rregulloren e Kuvendit. Në një intervistë në A2 CNN, Alibeaj tha se PD nuk duhej të jepte votat për fuqizimin e Komisionit për Nismat Qytetare, Bashkëpunimin dhe Mbikëqyrjen Institucionale, i drejtuar nga deputeti socialist Fatmir Xhafaj.
Në rregulloren e re të miratuar të enjten në mbrëmje, u përcaktua që kreu i SPAK-ut të mos raportojë më në seancë plenare përpara gjithë Kuvendit, por vetëm në komisionet parlamentare, përfshirë edhe komisionin që drejtohet nga Xhafaj.
Alibeaj deklaroi se ky ndryshim synon të rrisë kontrollin politik mbi sistemin e drejtësisë përmes komisionit parlamentar. Sipas tij, përmes këtij mekanizmi mund të ushtrohet ndikim mbi SPAK-un, duke përfshirë monitorime, rezoluta dhe propozime për ndryshime ligjore.
Ai kritikoi gjithashtu opozitën për votën e dhënë, duke argumentuar se po humbet mundësia që SPAK-u të shërbejë si aleat në përballjen me qeverinë. Në vijim, Alibeaj përmendi edhe reformën territoriale-administrative dhe ndryshimet kushtetuese, duke akuzuar palët politike se po vendosin interesat e tyre mbi interesin publik.
