Kreu i SPAK, Altin Dumani, ngriti sërish shqetësimin për mungesën e bashkëpunimit nga institucionet shtetërore, të cilat bëjnë shumë pak referime për veprat penale, duke lënë të kuptohet se institucioni që ai drejton shpesh ndodhet i vetëm në luftën kundër krimit të organizuar dhe korrupsionit.
“Ka institucione që lënë për të dëshiruar, por SPAK i ka inkurajuar vazhdimisht që të procedojnë me kallëzime në rastet kur kanë dyshime për shkelje të ligjit,” deklaroi Dumani.
I pyetur për hetimet lidhur me aferën e inceneratorit të Tiranës, kryeprokurori bëri të ditur se hetimet fokusohen në destinacionin e fondeve dhe mënyrën e zbatimit të kontratës.
“Pjesë e hetimit është edhe zbatimi i kontratës. Në momentin që u vendos sekuestrimi, Inceneratori i Tiranës kaloi nën administrimin e shtetit. Administratori ka detyrimin për ta menaxhuar dhe është përgjegjës për fondet,” sqaroi ai.
Për këtë aferë, SPAK po heton gjithashtu rolin e kryetarit të Bashkisë së Tiranës, Erion Veliaj.
