Kreu i SPAK, Altin Dumani, zhvilloi një takim informues me gazetarët që mbulojnë çështjet e drejtësisë, ku foli edhe për hetimet lidhur me dosjen “21 Janari”, duke pasur parasysh se nesër mbushen 14 vite nga vrasja e katër qytetarëve përpara Kryeministrisë gjatë demonstratës së opozitës së asaj kohe. Dumani deklaroi se për këtë çështje po kryhen hetime intensive.
“Çdo ditë për këtë çështje kryhen veprime konkrete, pasi e tillë është dinamika, që sjell nevojën për veprime të përditshme,” theksoi ai.
I pyetur për hetimet ndaj kryetarit të Bashkisë së Tiranës, Erion Veliaj, Dumani tha se nuk mund të japë detaje, por shtoi se kontrollet janë një mjet për kërkimin e provave, duke shmangur komente të mëtejshme për këtë çështje, e cila është ndër më sensitive të momentit.
Gjatë takimit, kryeprokurori i SPAK deklaroi se strategjia për hetimin e krimeve zgjedhore është pothuajse përfunduar dhe pritet miratimi i saj. “Strategjia e hetimit të krimeve zgjedhore thuajse ka përfunduar dhe pritet miratimi. Është menduar gjithashtu edhe një plan veprimi,” tha Dumani.
Në lidhje me akuzat e adresuara nga figura politike, kryesisht nga krerët e opozitës, z. Berisha dhe z. Meta, Altin Dumani deklaroi se ka vendosur të mos bëjë asnjë koment rreth tyre.
