Policia italiane ka gjetur këtë të enjte thikën me të cilën dyshohet se është vrarë studentja shqiptare, 22-vjeçarja Ilaria Sula, në Romë. I dyshuar për krimin është ish-i dashuri i saj, shtetasi filipinas Mark Samson.
Grupi hetues e gjeti thikën në shtëpinë e Samsonit, ku u zbuluan gjithashtu disa njolla gjaku.
Mediat italiane raportojnë se pas vrasjes, 23-vjeçari futi trupin e pajetë të Ilaria Sulës në një valixhe dhe e hodhi në një zonë të pyllëzuar disa kilometra larg Romës. Më pas, ai u kishte shkruar shoqërisë së viktimës për ta pyetur nëse ata e dinin se ku ndodhej ajo.
Ndërkohë, prindërit e Samsonit mund të përballen me akuza për bashkëpunim në krim, pasi dyshohet se ata ishin të pranishëm në shtëpi në momentin e vrasjes.
Në dëshminë e tij për autoritetet, Mark Samson ka pranuar aktin, por nuk ka treguar motivin e saktë të vrasjes. Sipas policisë, ngjarja mund të jetë nje krim pasioni.
Trupi i studentes shqiptare u gjet paraditen e së mërkurës, pasi vetë autori tregoi vendndodhjen. Ilaria Sula dhe Mark Samson kishin qenë të lidhur për një vit, por ishin ndarë. Të dy studionin në Universitetin “La Sapienza” të Romës, ajo në degën e statistikës dhe ai në arkitekturë.
Në shenjë homazhi, qindra studentë u mblodhën në ambientet e universitetit për të vendosur lule në nder të Ilaria Sulës, ndërsa miqtë e saj e kujtuan me lot në sy.
