Qeveria ka marrë vendim për reduktimin e orareve të punës së administratës, për shkak të temperaturave të larta të ditëve të fundit. Parashikohet që me vendimin e nesërm, orari i punës së administratës do të jetë nga 9.30 deri 15.30 të premten 9.30-13:00.
Në fakt vendosja e kësaj fashe orare është krejt pa kuptim, pasi fiks në pikun e të nxehtit qeveria detyron punonjësit që të jenë në punë. Por edhe për kaq qeveria duket se ka vënë dorën në zemër veç për administratën. Ndërkohë punëtorët që punojnë në ndërtim, në të nxehtin përvëlues dhe që janë më të ekspozuar ndaj vapës, qeveria i lë në punë.
Për të kuptuar seriozitetin e masave të qeverisë, mjafton që të bëjmë një krahasim me masat që ka marrë qeveria e Kosovës, e cila një vendim të tillë e ka marrë që para 4 ditësh.
Vendimi i qeverisë së Kosovës thoshte që gratë shtatzëna duhet të lirohen nga puna gjatë shtatë ditëve të ardhshme, ose duhet t’u mundësohet të punojnë nga shtëpitë e tyre. Gjithashtu edhe punëtorët me sëmundje kronike duhet të punojnë me orar të shkurtuar, deri në katër orë në ditë. Ndërsa ndalonte punën në ndërtim në ambiente të hapura nga ora 11:00 deri në orën 17:00, në të gjithë territorin e vendit, pra në orarin kur është dhe piku i vapës. Të njëjtat masa ka marë dhe qeveria e Greqisë.
Burimet thonë se vendimi i qeverisë pritet të dalë nesër. E nëse dikush nga ata që merret me këtë cështje na lexon kemi një këshille: mos u lodhni shumë të gjeni zgjidhje, shihni ç’ka bërë qeveria e Kosovës.
