Kur analizohen parametrat imunitar duhet të kemi parasysh kompleksitetin dhe lidhjen reciproke të ndërveprimeve dhe kontrollit të ndërsjellë midis:
Sistemit imunitar, Sistemit endokrin Sistemit nervor qendror. Kjo ndërthurje përfshin një sërë ndryshimesh të cilat përfshijnë stresin, kohën dhe cilësinë e gjumit, nivelin e aktivitetit fizik, pasivitetin fizik, duhanin, abuzimin me alkoolin, moshën dhe sidomos ushqimin. Prej kohësh dihet se ushqimi adekuat është një faktor shumë i rëndësishëm i cili lejon zhvillimin normal të sistemit imunitar në fazën e rritjes dhe funksionimin e tij korrekt gjatë gjithë jetës. Nga ana tjetër, kequshqyerja është një gjendje që shfaqet kur dieta e një personi nuk përmban sasinë dhe cilësinë e duhur të lëndëve ushqyese, dhe kjo i referohet si nënushqyerjes ashtu edhe mbiushqyerjes. Është demonstruar, se të gjitha funksionet e imunitetit në organizëm bazohen në një furnizim adekuat dhe cilësor të lëndëve ushqyese. Studimet shkencore kanë treguar se plotësimi i nevojave vetëm me një lloj lënde ushqyese, si dhe ndryshimet cilësore në disa makronutrientë, ndikojnë në funksionet specifike të imunitetit, duke ulur atë, edhe te individët e ushqyer mirë. Gjendja e përgjithshëme ushqimore e një individi rregullon funksionet e imunitetit të organizmit. Mbiushqyerja, e cila shkakton obezitet, dhe kequshqyerja, ndikojnë negativisht në funksionet e imunitetit të lindur dhe të fituar. Në fakt, të mos harrojmë se obeziteti, sidomos nëse shoqërohet me një humbje paralele të masës muskulore, shoqërohet me inflamacion kronik.
Dehidratimi dhe sistemi imunitar
Stili modern i jetës dhe rutina e përditëshme na bëjnë të pimë gjithnjë e më pak ujë dhe dita ditës të ndiejmë gjithnjë e më pak etjen. Uji nga trupi ynë eleminohet nëpërmjet frymëmarrjes, djersitjes dhe urinimit, dhe kur perceptimi i etjes ulet, rreziku i dehidrimit mund të rritet, sidomos në stinën e verës kur temperaturat janë të larta dhe qëndrojnë për një kohë të gjatë, siç është rasti i kësaj vere. Simptomat e një dehidrimi të lehtë janë shumë të zakonshme si, përgjumje, lodhje, këputje, lëkurë e thatë, dhimbje koke, kapsllëk dhe marramendje. Për të ruajtur një hidratim të mirë duhet të pimë një sasi uji çdo ditë që korrespondon me një minimum prej 3% të peshës së trupit tonë, përveç marrjes së frutave, perimeve, vitaminave dhe kripërave minerale. Këto substanca, të quajtura mikronutriente, duhet të balancohen me sasinë e ujit të pranishëm në trupin tonë dhe të ruajnë të ashtuquajturin ekuilibër hidroelektrolitik. Nëse ky ekuilibër mungon për shkak të mungesës së ujit ose mikronutrientëve, i pari që vuan është përkeqësimi i sistemit imunitar. Mangesa e disa mikronutrientëve specifikë shoqërohen me pasoja imunitare, dhe rritje të ndjeshmërisë ndaj sëmundjeve infektive. Shumë studime shkencore kanë treguar se shtimi në dietë i mikronutrientëve që mungojnë në dietën tonë të përditëshme, ndryshon funksionin imunitar dhe rezistencën ndaj infeksioneve, duke e përmirësuar atë.
Ushqimi
Përdorni një ushqim të ekuilibruar dhe të pasur me vitamina dhe kripëra minerale të rëndësishme si vitamina A, vitamina C, hekur, kalcium, magnez, selen, zink dhe vitaminë E, substanca të cilat janë thelbësore për funksione të panumërta biologjike që lidhen me imunitetin.
Integratorët
Një rol të rëndësishëm ka plotësimi me integratorë kur këto nevoja nuk plotësohen nëpërmjet ushqimit. Duhet të përdoren integratorët që përmbajnë kompleksin e vitaminave B të cilat kanë mikronutrientë të domosdoshëm që bëjnë metabolizmin e karbohidrateve, proteinave dhe lipideve. Vitaminat C, E dhe beta karotenet janë antioksidantë shumë të mirë. Vitamina C është gjithashtu e rëndësishme në metabolizmin e lipideve, bakri dhe zinku janë të përfshirë në metabolizmin e karbohidrateve, ndërsa kromi është në gjendje të përmirësojë ndjeshmërinë ndaj insulinës dhe është efektiv në reduktimin e lipideve të gjakut. Bikarbonati i kaliumit dhe natriumi ndihmojnë në ruajtjen e ekuilibrit acido-bazik të trupit, ndërsa magnezi dhe kaliumi janë thelbësorë për një ekuilibër të saktë hidroelektroloitik. Po ashtu, marrja e një suplementi ushqimor që integron nevojën ditore të vitaminës D është i dobishëm jo vetëm për shëndetin e kockave, por edhe për të mbështetur veprime të panumërta si të sistemit imunitar ashtu edhe të sistemit endokrin.
Dr. Skender Brataj
