SPAK akuzon 4 persona si organizator të grupit kriminal që trafikonte kokainë nga Amerika Latine dhe kishte ngritur një laborator përpunimi në Qerekë të Fushë Krujës. Ata janë Geis Fejsullai, Klajd Birçe, Aldi Zonja dhe Artion Çaushllari.
Endi Sejdini pronar i një mobilerie dyshohet se kishte përshtatur një nga katet e banesës së tij si laborator. Ndërsa Ismail Abdurrahmani nga Shkodra Baki Huqi nga Durrësi dyshohen si bashkëpunëtorë të grupit.
Tre shtetasit e huaj, Hiëlen Ledezma Narvaez, Joze Ramon Zacarias Vasquez dhe Samuel Alfonso Moreno Serrano mbërritën në Shqipëri për të bërë vecimin e kokainës nga lëkura e bagëtive ku ishte tretur.
Grupi përdorte si bazë një vilë luksoze në Kodrën e Diellit 2. Hetimet zgjatën më shumë se një vit e gjysmë. SPAK priti që në Shqipëri të mbërrinin të dyja ngarkesat, njëra në shtator dhe tjetra në nëntor dhe vetëm pasi nisi procesi i ndarjes së kokainës, ndërhyri në laborator dhe bëri të mundur arrestimin e dhjetë të dyshuarve. Sipas SPAK Qereka u zgjodh si pikë strategjike, afër Aeroportit të Rinasit dhe Portit të Durrësit, që lehtësonte trasportin, ndërsa mungonte monitorimi nga ajri.
“Laboratori i ngritur në Qerekë të Fushë Krujës dhe ambientet ndihmëse në Tiranë dhe Durrës, ishin vendosur në pika strategjike të infrastrukturës kombëtare. Pranë aeroportit më të madh të vendit, dhe portit të Durrësit, këto zona vështirësonin monitorimin nga ajri prej agjencive ligjzbatuese, dhe nga ana tjetër lehtësonin transportin e shpejtë të drogës dhe përzierësve kimike, duke siguruar një qasje të shpejtë në tregjet kombëtare dhe ndërkombëtare. Përzgjedhja e këtyre lokacioneve tregon qartazi një planifikim të kujdesshëm, ku distanca e afërt me nyjet kryesore të logjistikës kombëtare ishte një faktor kyç për funksionimin pa ndërprerje të këtij rrjeti kriminal”, theksoi SPAK.
Hetimi që u drejtua nga prokurori Adnand Xholi ishte ekskluzivitet i SPAK dhe nuk është ndarë asnjë e dhënë për policinë, për shkak të frikës së dekonspirimit. Madje, edhe raportimet mediatike bazuar në burimet policore, ishin të cunguara, për shkak se policia nuk kishte informacion mbi detajet e hetimit.
Ky aksion vjen disa javë pasi kreu i SPAK, Altin Dumani bashkë me një grup prokurorësh të Posacëm zhvilloi një vizitë në Brazil.
