SPAK ka nisur hetimet për Komisionin Qendror të Zgjedhjeve. Bëhet fjalë për 2 tendera për pajisjet e identifikimit biometrike si dhe votimit elektronik, me vlerë totale 21 milionë dollarë. Këto tendera janë fituar pa garë nga kompania 'Smartmatic International Holding B.V”.
SPAK i ka dërguar kërkesë KQZ, ku kërkohen dokumentet për 2 tenderat, në kuadër të zgjedhjeve parlamentare të vitit 2021. Kërkesa e drejtuar ndaj Komisionit Qendror të Zgjedhjeve mban emrin e kreu të SPAK, Altin Dumani dhe është firmosur më datë 16 gusht 2024.
“Prokuroria e Posaçme Kundër Korrupsionit dhe Krimit të Organizuar, për nevoja të hetimeve që po zhvillohen kërkon nga ana juaj dokumentacionin e plotë të praktikës së procedurës të prokurimit me nr.”REF-83073-12-23-2020″ me objekt “Sisteme/pajisje të teknologjisë së informacionit për identifikimin elektronik të votuesve dhe verifikim e tyre paszgjedhor” dhe të praktikës së procedurës të prokurimit me nr. “REF-89113-03-04-2021”, me objekt “Sisteme/pajisje të teknologjisë së informacionit për votimin dhe numërimin e votave” – thuhet në kërkesë.
Nga verifikimet që ka bërë VNA, rezulton se prokurimi që mban numrin e referencës REF-83073-12-23-2020, ka të bëjë me tenderin për blerjen e pajisjeve për identifikimin elektronik të votuesve u hap më 24 dhjetor 2020 dhe procedura e shpalljes ishte me negocim. Në këtë tender ka marrë pjesë vetëm subjekti “Smartmatic International Holding B.V”, e cila duke mos pasur konkurrent tjetër është shpallur fituese. Kjo ishte kompania e vetme në garë, pasi 5 të tjerat u tërhoqën. Kontrata me shoqërinë “Smartmatic International Holding B.V me seli në Holandë u firmos 10 Shkurt 2021.
Ndërsa prokurimi tjetër sipas kërkesës së SPAK është me numër reference “REF-89113-03-04-2021” që ka të bëjë me blerjet e pajisjeve të votimin dhe e numërimin elektronik për projektin e parë pilot të votimit elektronik në zgjedhjet e 2021, që u mbajt në 32 qendrat e votimit të njësisë administrative numër 10 në Tiranë. Edhe në këtë tender procedura e shpalljes ishte me negocim të drejtpërdrejtë. Gjithashtu në këtë prokurim fituese rezulton subjekti “Smartmatic International Holding B.V”. Fondi limit i tenderit ishte 1 miliardë lekë, ndërsa kompania fituese ofroi për ta realizuar punën për 994 milionë lekë të vjetra.
Kjo kompani ka fituar edhe tenderin tjetër për votimin dhe numërimin elektronik që u implementua në Elbasan, Kamëz e Vorë, në zgjedhjet lokale të vitit 2023.
