Gjykata e Posaçme dënoi me 1 vit e 6 muaj burg ish-kryebashkiakun demokrat të Pogradecit, Eduart Kapri. Ai u shpall fajtor për akuzën e “Shpërdorimit të detyrës” në bashkëpunim. Gjykata urdhëroi pezullimin e ekzekutimit të dënimit dhe e vendosi Kaprin në shërbim prove për një periudhë 2-vjeçare, gjatë së cilës nuk duhet të shoqërohet me persona të dënuar për vepra penale. Gjithashtu, atij iu hoq e drejta për të ushtruar funksione publike për 5 vite.
Besmira Niko dhe Besjan Meço, ish-vartës të Kaprit, u dënuan gjithashtu për shpërdorim detyre me shërbim prove për një periudhë prej 1 viti e 4 muaj. Të dyve iu hoq e drejta për të ushtruar funksione publike për 5 vite.
Hetimet zbuluan se Kapri, me ndihmën e dy zyrtarëve të tjerë, lejoi kompaninë "Gedi sh.p.k." të përfundonte punimet e pezulluara të një pallati 12-katësh. Kapri kishte qenë më herët administrator i kësaj kompanie, të cilën e kishte kaluar në emër të vëllait pasi u zgjodh kryetar bashkie.
