Sytë e botës së futbollit do të jenë sonte në Madrid, ku Reali i Madridit, në orën 21:00 pret Barcelonën për një tjetër spektakël të El Clasico-s. Katalanasit vijnë si liderë të La Liga, me 3 pikë para "galaktikëve". Koeficientët e tregojnë Ancelottin si favorit, dhe nëse Reali nuk humbet, do të barazojë rekordin e Barcelonës me 43 ndeshje radhazi pa disfatë në kampionat.
Trajneri Flick ka rikuperuar lojtarët Gavi, Olmo dhe Ansu Fati, dhe ka theksuar se skuadra e tij do të bëjë presion të lartë, siç bënë ndaj Bayernit në Champions League. Nga ana tjetër Ancelotti ka deklaruar se nuk ka frikë për asgjë, pavarësisht se i mungojnë portieri Courtois dhe Rodrygo, tha se përballja do jetë argëtim dhe spektakël.
Interesi për këtë ndeshje është jashtëzakonshëm. Kur biletat u vunë në shitje, mbi 1 milion tifozë ishin në pritje në faqen e Real Madrid. Çmimet e biletave për El Clasico fillonin nga 150 euro dhe shkonin deri në 450 euro, por për shkak të kërkesës së lartë, ato po rishiten në tregun e zi për shifra deri në 2200 euro.
