Kryeministrja e Italisë, Giorgia Meloni, ka shprehur pakënaqësinë e saj ndaj vendimit të Gjykatës së Romës, i cili urdhëroi kthimin e 12 emigrantëve nga kampi i Gjadrit në Shqipëri, për në Itali. Në një intervistë për median italiane “Il Tempo”, Meloni e cilësoi vendimin si të paarsyeshëm, duke theksuar se marrëveshja mes Italisë dhe Shqipërisë për trajtimin e emigrantëve do të vijojë të funksionojë pavarësisht këtij zhvillimi. Meloni ka treguar vendosmërinë e saj për të ruajtur marrëveshjet ekzistuese dhe për të vazhduar bashkëpunimin me Shqipërinë në këtë fushë.
E dija që do të kishim pengesa, por do t’i kapërcejmë. Protokolli Itali-Shqipëri do të funksionojë. Nuk do të lejoj të çmontohet një zgjidhje që ne e kemi përpiluar në përputhje të plotë me ligjin italian dhe atë europian, vetëm sepse ka një pjesë të politikës që nuk pajtohet më të. Jam e vendosur të eci përpara”, tha kryeministrja.
