Të gjithë para SPAK! Këtë herë thirrja ka ardhur nga kryetari i grupit parlamentar të PD-së, Gazment Bardhi, i cili ka dorëzuar personalisht dhjetëra denoncime në SPAK kundër qeveritarëve. Ndërkohë, nesër ai u ka kërkuar kolegëve të grupit parlamentar të protestojnë para dyerve të Prokurorisë së Posaçme për lirimin e kryetarit të PD-së.
“Të nderuar kolegë, nesër në orën 12:00, do të jemi përpara SPAK, sipas njoftimit që është bërë publik. Ndërkohë, mbledhjen e radhës së Grupit Parlamentar, në lidhje me seancën plenare, do ta zhvillojmë të enjten, në orën 09:00, në seli. Ju falënderoj”, thuhet në njoftimin e Bardhit.
Edhe pse zakonisht i rezervuar në sulmet ndaj SPAK, Gazment Bardhi, tani drejtues i lartë i PD-së nën Sali Berishën, duket se po ndjek ritmin e njohur të politikës: lirimi i kryetarit demokrat dhe sulmet ndaj Prokurorisë së Posaçme. Nuk dihet nëse nesër, bashkë me zotin Bardhi, do të jenë edhe nënkryetari i Kuvendit, Agron Gjekmarkaj, apo deputetja Jorida Tabaku, e cila së fundmi është bashkuar zyrtarisht me PD-në e Berishës.
