Ish-deputeti i Partisë Demokratike, Gerti Bogdani, i cili ndërroi jetë një ditë më parë pas një arresti kardiak, do të përcillet sot për në banesën e fundit. Kuvendi i Shqipërisë ka njoftuar se seanca plenare e planifikuar për këtë të enjte është shtyrë, për t’u hapur rrugë homazheve në nderim të Bogdanit. Homazhet dhe ceremonia e lamtumirës do të mbahen në Sallën e Seancave Plenare të Parlamentit, nga ora 10:00 deri në 12:00, ndërsa varrimi do të kryhet në varrezat e Sharrës.
Në shenjë respekti, Partia Demokratike ka shpallur ditë zie këtë të enjte. Flamuri kombëtar dhe ai i PD-së do të ulen në gjysmështizë në të gjitha selitë e partisë, ndërsa në orën 12:00 do të mbahet një minutë heshtje. Arkëmorti me trupin e Bogdanit ka mbërritur në Kuvend, ku kanë nisur homazhet, të cilat po ndiqen nga familjarë, miq, kolegë dhe qytetarë që kanë ardhur për të nderuar ish-deputetin.
