Komisioni i Apelit në FSHF ka anuluar dënimin të cilin Komisioni i Disiplinës dhe Etikës kishte vendosur për Tiranën, që e detyronte të luante pa tifozë deri në fund të sezonit. Dënimi ka ndryshuar, duke u bërë me tetë ndeshje pa spektatorë, nga të cilat tri janë kryer tashmë dhe pjesa tjetër është pezulluar me kusht.
Dënimi erdhi pas ngjarjes në ndeshjen me Vllazninë, më 30 tetor, ku tifozët e Tiranës shkaktuan ndërprerjen e lojës, e cila përfundoi 3-4 në favor të shkodranëve. Pas atij incidenti, Tirana luajti pa tifozë në ndeshjet me Egnatias, Bylisin dhe Elbasanin. Me vendimin e Apelit, në derbin e 1 dhjetorit me Partizanin, tifozët e Tiranës do të mund të jenë të pranishëm në stadium.
Vendimi i Apelit:
Komisioni i Apelit pasi mori në shqyrtim ankimin e Klubit të Futbollit Tirana,
Vëren se:
Me vendimin nr.13, pika 1 datë 01.11.2024 Komisioni i Disiplinës dhe Etikës ka vendosur të marrë kundrejt KF Tirana, masat disiplinore si më poshtë vijon:
KF Tirana, për sjellje të gabuar të spektatorëve, duke hedhur sende në fushën e lojës dhe duke mos garantuar sigurinë e lojtarëve të ekipit mik, në bazë të neneve 6/3/b, 8/1, 17/1, 17/2/b, 17/2/c dhe 17/2/h të KDE, dënohet me gjobë në masën 300.000 (treqind mijë) lekë dhe zhvillimin pjesës së mbetur të ndeshjeve të sezonit futbollistik 2024-2025 pa spektatorë.
Më datë 09.11.2024 KF Tirana, ka paraqitur ankim me objekt:
Rrëzimin e Vendimit13, pika 1 datë 01.11.2024 të Komisionit të Disiplinës dhe Etikës.
Komisioni i Apelit të Disiplinës dhe Etikës pasi u njoh me relacionin e Sekretariatit Teknik, dogjoi përfaqësuesit e Klubit të Futbollit Tirana, shqyrtoi dokumentacionin e paraqitur dhe diskutoi çështjen në tërësi si dhe duke u bazuar në nenet 65 e vijues të Kodit të Disiplinës dhe Etikës,
VENDOSI:
Lënien në fuqi të masës së dënimit me gjobë në masën 300.000 (treqind mijë) lekë.
Ndryshimin e pjesës tjetër të vendimit duke vendosur:
Dënimin e Klubit të Futbollit Tirana për zhvillimin e të 8 (tetë) ndeshjeve pa spektatorë.
Pezullimin e pjesës së mbetur të dënimit prej 5 (pesë) ndeshjesh.
Pezullimi i dënimit revokohet nëse gjatë periudhës së provës KF Tirana kryen një shkelje tjetër të natyrës dhe rëndësisë së ngjashme.
Periudha e provës do të jetë deri në përfundim të sezonit futbollistik 2024-2025.
Kundër këtij vendimi lejohet ankim në Gjykatën e Arbitrazhit Sportiv (CAS/TAS) Lozanë Zvicër.
