Që konsumimi i tepërt i alkoolit është i dëmshëm për shëndetin nuk është një sekret, dhe prej vitesh komuniteti shkencor debaton mbi atë se cila është, dhe nëse ekziston, sasia e duhur për t’u konsumuar pa pasur pasoja për ekuilibrin psiko-fizik.
Por kirurgu i përgjithshëm amerikan, Vivek Murthy, i njohur për vendimet radikale për mbrojtjen e qytetarëve – si kur propozoi të vendosej një paralajmërim mbi rreziqet për shëndetin mendor në çdo platformë të rrjeteve sociale – kësaj rradhe ka shkuar më tej.
Shefi operacional i shëndetësisë në SHBA ka kërkuar që mbi pijet alkoolike të vendoset një etiketë paralajmëruese për rreziqet e kancerit, të ngjashme me ato që prej vitesh gjenden në paketat e cigareve. Gjithashtu, Murthy ka shprehur nevojën për të rishikuar udhëzimet mbi kufijtë e konsumit, që në SHBA janë ndër më të rreptat në botë.
Sipas të dhënave të përmendura nga Murthy, konsumimi i alkoolit rrit rrezikun e zhvillimit të të paktën shtatë llojeve të kancerit: të gjirit, zorrës së trashë, mëlçisë, ezofagut, gojës, fytit dhe laringut. “Lidhja e drejtpërdrejtë mes konsumit të alkoolit dhe rrezikut të kancerit është e mirëdokumentuar për këto lloje të kancerit, pavarësisht llojit të pijes, qoftë birrë, verë apo pije të tjera alkoolike,” theksohet në një deklaratë të Murthy-t.
Për dekada, kërkimet dhe studimet në SHBA dhe më gjerë kanë mbështetur idenë se konsumimi i moderuar ndihmonte në parandalimin e infarktit dhe iktusit. Por hulumtimet e fundit e kanë lidhur konsumin e alkoolit, edhe brenda kufijve të rekomanduar, me disa lloje të kancerit.
Aktualisht, etiketat në shishet dhe kanaçet paralajmërojnë vetëm për rreziqet për gratë shtatzëna ose para drejtimit të automjetit apo përdorimit të makinerive të ndryshme. Por Murthy dëshiron që paralajmërimi të jetë shumë më i qartë.
Francesco Perrone, president i Shoqatës Italiane të Onkologjisë Mjekësore (AIOM), thotë: “Nuk është një lajm i ri që alkooli shoqërohet me zhvillimin e kancerit: është një faktor rreziku dhe nuk ekziston një dozë e sigurt. Ajo që ndoshta përbën një lajm është që dikush kërkon të aplikohen mbi alkoolin mënyra komunikimi mbi rrezikshmërinë që deri tani janë rezervuar kryesisht për duhanin.”
Nga ana tjetër, konsumimi i alkoolit është përgjegjës për 100,000 raste të kancerit në SHBA dhe për 20,000 vdekje nga kanceri çdo vit, më shumë se 13,500 vdekjet nga aksidentet rrugore të lidhura me alkoolin.
“Konsumimi i alkoolit është shkaku i tretë i parandalueshëm i kancerit në SHBA, pas duhanit dhe obezitetit, duke rritur rrezikun për të paktën shtatë lloje kanceri,” paralajmëroi ai.
Vetëm Kongresi mund ta detyrojë këtë masë dhe nuk është e qartë nëse administrata e ardhshme është e favorshme ndaj ndryshimit. Presidenti i zgjedhur Donald Trump nuk konsumon alkool dhe shpesh ka treguar se është abstinent për shkak se vëllai i tij vdiq pikërisht për shkak të një varësie ndaj alkoolit. Gjithashtu, Robert F. Kennedy Jr., i zgjedhur nga Trump për të drejtuar Shëndetësinë, ka pasur një të kaluar me varësi nga droga dhe alkooli, por ka siguruar se i ka braktisur plotësisht dekada më parë.
Ndërkohë, paralajmërimi i Murthy-t po shkakton rënie të aksioneve të kompanive të sektorit. Në bursën italiane, aksionet e Campari ranë me 3.8%, një humbje e përbashkët për të gjithë prodhuesit e pijeve alkoolike në Evropë. Remy Cointreau humbi 4.3%, Pernod Ricard 2%, Diageo 2.4%, dhe AB InBev 1.9%.
