Detaje të reja kanë dalë në dritë nga tragjedia e ndodhur në Domen të Postribës, ku humbën jetën 24-vjeçarja Bleona Çelaj dhe dy fëmijët e saj të mitur.
Nëna e së resë ka deklaruar para Policisë së Shkodrës se vajza e saj dhunohej prej kohësh nga bashkëshorti. Edhe pse në gjendje të rënduar psikologjike, ajo ka dëshmuar se familja kishte tentuar disa muaj më parë ta merrte Bleonën së bashku me dy fëmijët, pasi kjo e fundit kishte kërkuar të largohej nga bashkëshorti. Megjithatë, sipas saj, 24-vjeçarja më pas kishte ndryshuar mendim dhe kishte vendosur të qëndronte me të.
Sipas familjarëve, Bleona nuk kishte telefon celular dhe komunikimet me ta ishin të rralla, pasi jetonte në Gjermani. Ata kanë pohuar gjithashtu se marrëdhëniet mes dy familjeve ishin të ftohta dhe komunikimi mes tyre ishte i kufizuar, tension që, sipas burimeve, u vu re edhe një ditë më parë, kur ndodhi tragjedia. Megjithatë, të dy familjet u bashkuan sot në ceremoninë mortore.
Nga ana tjetër, bashkëshorti i 24-vjeçares ka deklaruar para hetuesve se mes tyre nuk kishte konflikte në çift. Burime bëjnë me dije se ai ndodhet në gjendje të rënduar psikologjike pas humbjes së bashkëshortes dhe dy fëmijëve.
Pavarësisht pretendimeve të familjarëve për dhunë në familje, grupi hetimor, bazuar në këqyrjen e vendit të ngjarjes, provat e administruara dhe ekspertizën mjeko-ligjore, ka arritur në përfundimin paraprak se zjarri që i mori jetën nënës dhe dy fëmijëve ka qenë aksidental.
Për hetimin e ngjarjes janë angazhuar edhe ekspertë të zjarreve nga Tirana. Sipas hetuesve, deri në këtë fazë nuk rezulton që pretendimet për dhunë të kenë lidhje me shkakun e tragjedisë. Dyshimet kryesore janë se një rrjedhje gazi nga bombola ka shkaktuar shpërthimin, ndërsa prania e një shisheje me benzinë në banesë ka ndikuar në përhapjen e shpejtë të flakëve dhe fuqinë e eksplozionit.
Policia ka sekuestruar pjesë të bombolës së gazit dhe prova të tjera materiale të gjetura në vendngjarje, të cilat janë dërguar në Tiranë për ekspertizë të specializuar.
Sipas hetimeve, në momentin e ngjarjes në banesën e braktisur ndodheshin vetëm Bleona Çelaj dhe dy fëmijët e saj, ndërsa bashkëshorti kishte dalë në një market. Çifti ishte kthyer vetëm pak ditë më parë nga Gjermania. Bashkëshorti është shtetas gjerman, ndërsa 24-vjeçarja ishte në proces të rregullimit të dokumentacionit.
Policia dhe Prokuroria vijojnë hetimet për zbardhjen e plotë të ngjarjes. Deri më tani, autoritetet kanë përjashtuar pistën e vetëvrasjes apo të një akti të qëllimshëm ndaj fëmijëve, duke e konsideruar tragjedinë si pasojë të një aksidenti.
