Gjykata e Posaçme ka shtyrë për më 17 nëntor seancën gjyqësore ndaj kryebashkiakut të Tiranës, Erion Veliaj, dhe të pandehurve të tjerë, për shkak të mungesës së avokatit të Gentian Sulës. Ndërkohë, gjykata ka vendosur pezullimin e afateve të paraburgimit për Veliajn.
Gjatë seancës së sotme, Veliaj i është drejtuar gjykatës përmes një letre, në të cilën ka deklaruar se do të marrë pjesë në procesin gjyqësor vetëm pasi t'i lejohet qëndrimi në sallë dhe jo në kafazin e sigurisë.
Në letrën e tij, kryebashkiaku i Tiranës ka ngritur akuza të drejtpërdrejta ndaj kryeministrit Edi Rama, duke pretenduar se transferimi i tij nga institucioni i vuajtjes së dënimit në Durrës drejt atij në Fier është kryer me kërkesë të kreut të qeverisë.
“Dëshiroj të përfaqësohem nga avokati Plarent Ndreca dhe dua të sqaroj se jam duke e bërë këtë deklaratë me vullnetin e lirë dhe pa asnjë presion. E nderuar gjykatë, siç edhe keni rënë në dijeni nga media, të mërkurën jam rrëmbyer nga një togë shoqërimi, pa asnjë shkak dhe vendim të komunikuar. Më kanë larguar familja, avokati dhe Bashkia, institucioni që drejtoj. Nuk e dija pse ndodhi kjo deri të premten në mbrëmje, ku m'u komunikua nga ministri i Drejtësisë, Toni Gogu, i cili ma bëri të qartë se transferimi ka ndodhur me kërkesë të kryeministrit Edi Rama, siç tha ai, që unë të bëja burg tamam. Ministri më komunikoi se do t'i kërkohej SPAK të më hetonte edhe për prishje të rendit kushtetues, si i përfshirë në protestat e flamingove dhe studentëve. Kërkoj nga ju të kryeni një hetim të plotë dhe kam besim te ju”, thuhet në letrën e Veliajt drejtuar gjykatës.
Nga ana tjetër, Gjykata e Posaçme ka sqaruar se nuk është kompetente për të shqyrtuar çështjen e transferimit të të paraburgosurve nga një institucion i ekzekutimit të vendimeve penale në një tjetër.
Megjithatë, gjykata ka theksuar se Drejtoria e Përgjithshme e Burgjeve nuk e ka njoftuar zyrtarisht për transferimin e Veliajt nga IEVP Durrës në IEVP Fier, ndonëse ka detyrimin ligjor për ta bërë këtë.
Sa u përket pretendimeve të tjera të ngritura nga kryebashkiaku i Tiranës, gjykata ka sqaruar se i pandehuri duhet të ndjekë rrugën ligjore për trajtimin dhe shqyrtimin e tyre.
