Magnezi konsiderohet një nga mineralet më të rëndësishme për organizmin, duke luajtur rol kyç në funksionimin e çdo organi dhe sistemi në trup. Ai merr pjesë në rreth 300 reaksione biokimike dhe ndihmon në rregullimin e tensionit të gjakut, ndërsa mungesa e tij mund të sjellë pasoja serioze për shëndetin.
Sipas ekspertëve, kur niveli i magnezit bie, organizmi reagon me një sërë simptomash si lodhja kronike, kontraktimet muskulare, të përzierat, kapsllëku dhe mpirja e duarve. Nëse kjo gjendje neglizhohet, rreziku për komplikacione rritet ndjeshëm, duke përfshirë tensionin e lartë të gjakut, osteoporozën, gurët në veshka dhe sëmundjet e zemrës.
Shkaktarët kryesorë të mungesës së magnezit lidhen me faktorë të ndryshëm si diabeti, mosha, diarreja apo përdorimi i disa medikamenteve. Gjithashtu, gratë shtatzëna dhe lehonat janë ndër grupet më të rrezikuara.
Shenjat paralajmëruese që nuk duhen injoruar përfshijnë:
Kontraktimet dhe spazmat muskulare, shpesh të shoqëruara me mpirje të gjymtyrëve
Humbje oreksi, të përziera dhe të vjella
Probleme me zemrën dhe luhatje të humorit, përfshirë ankthin dhe depresionin
Çrregullime të gjumit dhe pagjumësi
Dëshirë e shtuar për çokollatë, sidomos atë të zezë
Specialistët këshillojnë që mungesa e magnezit të trajtohet në kohë përmes një diete të balancuar, hidratimit të mjaftueshëm dhe, nëse është e nevojshme, suplementeve të rekomanduara nga mjeku.
Kujdesi ndaj këtij minerali është thelbësor për të shmangur probleme më serioze shëndetësore dhe për të ruajtur mirëqenien e përgjithshme të organizmit.
