Leonid Radvinsky, sipërmarrësi ukrainas-amerikan dhe pronari i platformës së njohur OnlyFans, ka ndërruar jetë në moshën 43-vjeçare pas një beteje të gjatë me kancerin.
Lajmi u konfirmua të hënën nga kompania, e cila bëri të ditur se ai “u nda nga jeta në paqe”, ndërsa familja ka kërkuar privatësi në këtë periudhë të vështirë.
Radvinsky bleu në vitin 2018 kompaninë Fenix International, që zotëron dhe operon OnlyFans, dhe mbeti aksionari kryesor dhe drejtor i saj. Nën drejtimin e tij, platforma u kthye në një nga sukseset më të mëdha, por edhe më të debatueshme në industrinë teknologjike britanike.
OnlyFans revolucionarizoi industrinë e përmbajtjes për të rritur, duke u dhënë krijuesve mundësinë të lidhen drejtpërdrejt me audiencën e tyre dhe të përfitojnë 80% të të ardhurave, ndërsa platforma mban 20%.
Kompania ka shënuar rritje të jashtëzakonshme, duke gjeneruar rreth 7.2 miliardë dollarë të ardhura nga përdoruesit vetëm vitin e kaluar dhe duke shpërndarë mbi 25 miliardë dollarë për krijuesit që nga themelimi në vitin 2016.
Radvinsky, i cili jetonte në Florida, ishte një figurë e rezervuar publike, por përfitonte nga disa prej dividentëve më të mëdhenj në Britani. Vetëm vitin e kaluar, ai përfitoi rreth 701 milionë dollarë në dividentë.
Para vdekjes, ai ishte në bisedime për shitjen e një pjese të konsiderueshme të platformës dhe kishte shqyrtuar më herët mundësinë e daljes në bursë, një plan që nuk u realizua.
