Ushtria amerikane ka paralajmëruar se çdo anije që hyn ose del nga zona e bllokadës së saj të ardhshme pa leje do të jetë “subjekt i ndjekjes, devijimit dhe kapjes”.
Në një njoftim për detarët, të raportuar nga Reuters, Komanda Qendrore e SHBA-së ka bërë të ditur se do të zbatojë një bllokadë në Gjirin e Omanit dhe në Detin Arabik, në lindje të Ngushticës së Hormuzit, duke filluar nga ora 15:00 sipas kohës së Mbretërisë së Bashkuar sot.
Sipas këtij njoftimi, bllokada do të zbatohet për të gjithë trafikun detar, pavarësisht flamurit nën të cilin lundrojnë anijet.
“Çdo anije që hyn ose largohet nga zona e bllokuar pa autorizim i nënshtrohet përgjimit, devijimit dhe kapjes. Bllokada nuk do të pengojë kalimin neutral të tranzitit përmes Ngushticës së Hormuzit për në ose nga destinacione jo-iraniane”, thuhet në deklaratën zyrtare të publikuar në njoftim.
Ndërkohë, presidenti amerikan Donald Trump fillimisht ka deklaruar në rrjetet sociale se marina amerikane do të ndalonte kalimin e “çdo dhe të gjitha” anijeve nëpër Ngushticën e Hormuzit, por më pas ushtria amerikane ka sqaruar se masa do të zbatohet “në mënyrë të paanshme” për anijet që hyjnë dhe dalin nga portet iraniane, duke korrigjuar kështu interpretimin fillestar të deklaratës së tij.
