Franca ka njohur zyrtarisht shtetin palestinez, duke u bërë pjesë e valës së vendeve që kanë ndërmarrë këtë hap. Presidenti Emmanuel Macron, duke folur në Asamblenë e Përgjithshme të OKB-së në Nju Jork, tha se “koha për paqe ka ardhur” dhe se “asgjë nuk justifikon luftën e vazhdueshme në Gaza”.
Të martën pritet të flasë para Asamblesë edhe presidenti amerikan Donald Trump, si dhe liderët e Jordanisë e Katarit. SHBA nuk mori pjesë në samitin e një dite më parë të organizuar nga Franca dhe Arabia Saudite mbi zgjidhjen me dy shtete, ku munguan gjithashtu Gjermania dhe Italia.
Pas Britanisë, Kanadasë, Australisë e Portugalisë, edhe Belgjika, Luksemburgu, Malta, Andorra dhe San Marino pritet të njohin Palestinën.
Izraeli ka kundërshtuar fuqishëm, duke thënë se kjo do të shpërblente Hamasin për sulmin e 7 tetorit 2023, kur u vranë rreth 1,200 njerëz dhe u morën 251 pengje. Që atëherë, sipas autoriteteve të Hamasit në Gaza, mbi 65 mijë palestinezë janë vrarë nga ofensiva izraelite.
Macron bëri thirrje për ndërprerjen e luftës, lirimin e pengjeve dhe një administratë kalimtare në Gaza nën Autoritetin Palestinez, duke paralajmëruar për rrezikun e “luftërave të pafundme”. Ai tha se Franca do të hapte ambasadën e saj në një shtet palestinez vetëm pasi të arrihet armëpushimi dhe të lirohen pengjet.
Sekretari i Përgjithshëm i OKB-së Antonio Guterres e cilësoi situatën në Gaza si “moralisht, ligjërisht dhe politikisht të papranueshme”, ndërsa presidentja e Komisionit Evropian Ursula von der Leyen njoftoi një mekanizëm të ri për rindërtimin e Gazës.
Presidenti palestinez Mahmoud Abbas, i cili nuk u lejua të udhëtojë në SHBA, foli me videolidhje duke kërkuar armëpushim të përhershëm dhe dorëzimin e armëve nga Hamas. Ai theksoi se e ardhmja e palestinezëve dhe izraelitëve varet nga paqja.
Nga ana tjetër, zyrtarët izraelitë thanë se pas 7 tetorit çdo ide e një shteti palestinez është “jashtë tavolinës”, ndërsa kryeministri Benjamin Netanyahu përsëriti se nuk do të lejohet kurrë një shtet palestinez në perëndim të lumit Jordan.
