Unioni Sindacati di Base (USB) ka shpallur një grevë të përgjithshme 24-orëshe për të hënën, 22 shtator, që do të përfshijë sektorin publik dhe privat në të gjithë Italinë. Nga transporti e fabrikat, te logjistika, portet dhe shkollat, miliona punëtorë e punëtore pritet të ndalojnë punën, duke bllokuar vendin.
Grevën e përgjithshme e ka nxitur thirrja e punëtorëve të porteve, si pjesë e një mobilizimi në mbështetje të popullit palestinez dhe të misionit ndërkombëtar Global Sumud Flotilla. “Indinjata për atë që po ndodh në Gaza dhe për bashkëpunimin e qeverive perëndimore, Italia në krye, është e gjithanshme dhe pa kufij”, shkruan USB.
Më shumë se 60 manifestime janë planifikuar në mbarë Italinë, nga qytetet e mëdha deri në qendrat e vogla. Në Romë grumbullimi do të nisë në orën 11:00 në Piazza dei Cinquecento, në Milano në 10:00 në Piazzale Cadorna, në Torino në 10:30 në Piazza Carlo Felice, në Bologna në Piazza Maggiore në orën 10:30, ndërsa në Genova protesta nis që prej orës 08:00 në portin Albertazzi.
“Me 22 shtator të gjithë mund të dalin në sheshe për të ndërprerë çdo bashkëpunim me shtetin e Izraelit, për të mbrojtur Gazën dhe për të ndaluar gjenocidin, për të thënë jo garës së armatimit dhe luftës, krah Global Sumud Flotilla”, apelon sindikata USB.
Grevë pritet të ndikojë ndjeshëm edhe transportin. Në Romë, Atac ka njoftuar se shërbimi i transportit publik do të garantohet vetëm gjatë fashave ligjore, nga fillimi i shërbimit deri në orën 08:29 dhe nga ora 17:00 deri në 19:59. Në Milano, kompania ATM ka paralajmëruar se linjat mund të mos funksionojnë nga ora 08:45 deri në 15:00 dhe pas orës 18:00 deri në përfundim të shërbimit.
