Irani pritet të rivendosë gradualisht aksesin në internet brenda kësaj jave, 11 ditë pasi autoritetet ndërprenë telekomunikacionin në të gjithë vendin, mes protestave masive antiqeveritare.
Zëvendëspresidenti i Iranit për shkencën, teknologjinë dhe ekonominë, Hossein Afshin, deklaroi të hënën në televizionin shtetëror se “qasja në internet do të rikthehet gradualisht në funksionimin normal këtë javë”.
Sipas CNN, edhe kreu i Komisionit parlamentar për Sigurinë Kombëtare dhe Politikën e Jashtme, Ebrahim Azizi, ka bërë të ditur se vendimi për rivendosjen e plotë të internetit do të merret nga organet më të larta të sigurisë në ditët në vijim, duke theksuar se shërbimi do të rifillojë sapo të krijohen kushtet e nevojshme të sigurisë.
Ndërkohë, deputeti i linjës së ashpër Hamid Rashaei ka deklaruar se autoritetet duhej të kishin marrë më herët në konsideratë paralajmërimet e Udhëheqësit Suprem Ali Khamenei lidhur me, siç e quajti ai, “hapësirën e lirshme kibernetike”.
Komunikimet në Iran, përfshirë internetin dhe linjat telefonike ndërkombëtare, u ndërprenë kryesisht në ditët që paraprinë shpërthimin e trazirave më të rënda. Ndërprerja është lehtësuar pjesërisht ditët e fundit, duke bërë të mundur daljen në dritë të raportimeve për sulme të përhapura ndaj protestuesve.
