Athinë – Një tjetër grevë e taksistëve grekë ka paralizuar kryeqytetin Athinë, ndërsa sindikata e tyre ka nisur një protestë 48-orëshe kundër politikave fiskale dhe liberalizimit të sektorit të taksive.
Sindikata e taksistëve shprehet se projektligji i qeverisë, i cili parashikon dhënien e licencave për krijimin e kompanive të taksive dhe hapjen e tregut për mini-busët, do të vendosë mijëra profesionistë në krizë financiare. Theksohet gjithashtu se rritjet e taksave dhe klauzolat fiskale janë të qëllimshme për të favorizuar kompanitë shumëkombëshe të taksive.Nga ana tjetër, Ministria Greke e Transportit argumenton se sektori i taksive nuk përmbush nevojat e tregut, veçanërisht në zonat turistike, ku vihen re monopole dhe abuzime ndaj klientëve. Ministria thekson se të gjitha të ardhurat e sektorit duhet të deklarohen ligjërisht, ndërsa praktikat e abuzimit dhe vjedhjeve kanë krijuar një perceptim negativ për drejtuesit e taksive.
Sondazhet e fundit sugjerojnë që qeveria të marrë masa drastike për të luftuar fenomenet monopoliste dhe abuzimet në këtë sektor, i cili konsiderohet jetik për industrinë turistike të vendit.
Në këtë situatë, qytetarët dhe turistët përballen me vonesa të konsiderueshme dhe mungesë të shërbimeve të transportit urban.
