Një hetim i BBC ka zbuluar se kompania amerikane UG Solutions (UGS), e cila ka kontratë për të siguruar vendet e shpërndarjes së ndihmave në Gaza, ka punësuar dhjetëra anëtarë të bandës Infidels Motorcycle Club, e njohur për qëndrime të hapura anti-myslimane.
BBC ka konfirmuar identitetin e të paktën 10 anëtarëve që punojnë si roje të armatosur në vendet e Fondacionit Humanitar të Gazës (GHF), ku qindra civilë janë vrarë mes kaosit dhe të shtënave me armë. Shtatë prej tyre mbajnë pozicione drejtuese.
Banda me histori islamofobe
Faqja në Facebook e bandës vazhdon të publikojë gjuhë urrejtjeje ndaj myslimanëve dhe ka promovuar evente provokuese, si therja e derrit gjatë Ramazanit. Edward Ahmed Mitchell, zëvendësdrejtor i CAIR (Këshilli për Marrëdhënie Amerikano-Islamike), e krahasoi situatën me “t’i japësh KKK-së ndihmat humanitare për t’i shpërndarë në Sudan”, duke paralajmëruar se dhuna ishte e pashmangshme – dhe kjo tashmë është provuar në Gaza.
Lideri i bandës, Johnny “Taz” Mulford, ish-sergent i ushtrisë amerikane i dënuar më parë për ryshfet dhe mashtrim, drejton sot kontratën e UGS në Gaza. Ai dhe shumë nga ndjekësit e tij mbajnë tatuazhe me simbole të kryqëzatave, përfshirë vitin 1095 – fillimin e Kryqëzatës së parë, që përfundoi me masakrën e myslimanëve dhe hebrenjve në Jerusalem.
Rekrutime dhe pagesa marramendëse
Dokumente të siguruara nga BBC tregojnë se Mulford rekrutoi hapur veteranë amerikanë për punë në Gaza, duke u bërë thirrje atyre që “dinë ende të qëllojnë, lëvizin dhe komunikojnë”. Sipas një ish-kontraktori, rreth 40 nga 320 punonjësit e UGS në Gaza janë rekrutuar nga kjo bandë. Çdo roje paguhet rreth 980 dollarë në ditë, ndërsa drejtuesit marrin deri në 1,580 dollarë.
Një prej tyre, Josh Miller, postoi një foto nga Gaza me sloganin “Make Gaza Great Again”. Ai shet edhe bluza me slogane të tilla si “embrace violence” dhe “Surf all day, rockets all night. Gaza summer 25”.
Skandalet në krye të kompanisë
Vetë themeluesi dhe drejtori ekzekutiv i UGS, Jameson Govoni, është arrestuar në Karolinën e Veriut për përfshirje në një aksident me “hit-and-run” dhe për tentativë për t’i shpëtuar policisë. Ai refuzoi të komentojë.
Pasojat në Gaza
Sipas OKB-së, deri më 2 shtator, 1,135 civilë – gra, burra dhe fëmijë – janë vrarë pranë qendrave të ndihmës. Shumica e viktimave janë shkaktuar nga forcat izraelite, por ka edhe akuza se rojet private të UGS kanë hapur zjarr ndaj turmave. Kompania i ka mohuar këto akuza, por ka pranuar përdorimin e “të shtënave paralajmëruese”.
Në deklaratën e saj, UGS mbrojti Mulford si “figurë të besueshme me mbi 30 vite eksperiencë”, duke thënë se nuk diskriminon punonjësit për “hobe personale apo lidhje” që nuk lidhen me punën. Ndërkohë, Fondacioni Humanitar i Gazës e përshkroi stafin si “të larmishëm” dhe “të suksesshëm”.
