Një operacion i Shteteve të Bashkuara në Venezuelë, i cilësuar nga presidenti Donald Trump si “brilant”, ka tronditur skenën ndërkombëtare, duke ngritur pikëpyetje mbi fatin e presidentit Nicolás Maduro. Sipas mediave të huaja, operacioni dyshohet se është kryer nga njësia elitare amerikane Delta Force.
Zëvendëspresidentja e Venezuelës, Delcy Rodríguez, u shfaq në televizionin shtetëror duke deklaruar se qeveria nuk ka informacion mbi vendndodhjen e presidentit Maduro dhe bashkëshortes së tij, Cilia Flores. Ajo i bëri thirrje SHBA-së të paraqesë prova se të dy janë gjallë.
Reagimet ndërkombëtare nuk kanë munguar. Rusia e dënoi ashpër aksionin ushtarak amerikan, duke e quajtur një akt agresioni të pajustifikuar. Ministria e Jashtme ruse deklaroi se “armiqësia ideologjike ka triumfuar mbi diplomacinë”, duke e cilësuar sulmin si thellësisht shqetësues dhe të dënueshëm.
Spanja u ofrua menjëherë të ndërmjetësojë mes palëve për të gjetur një zgjidhje paqësore për krizën në Venezuelë. Ndërkohë, Ambasada e Italisë në Karakas u bëri thirrje qytetarëve italianë të qëndrojnë në shtëpi për arsye sigurie, ndërsa kryeministrja Giorgia Meloni po monitoron nga afër situatën.
Edhe Kuba dhe Kolumbia reaguan ashpër, duke dënuar shpërthimet dhe duke kërkuar një reagim urgjent nga komuniteti ndërkombëtar kundër asaj që e përshkruajnë si një sulm kriminal të SHBA-së ndaj Venezuelës. Presidenti kuban Miguel Díaz-Canel shkroi në platformën X se rajoni po “sulmohet brutalisht”, duke e cilësuar ndërhyrjen si “terrorizëm shtetëror kundër popullit të guximshëm venezuelian”.
Nga ana tjetër, Trump ka akuzuar Venezuelën se po furnizon SHBA-në me drogë, ndërsa administrata e tij prej muajsh ka intensifikuar veprimet ushtarake ndaj anijeve që vijnë nga Amerika e Jugut, të cilat pretendon se transportojnë lëndë narkotike.
