Kryetari i Partisë Demokratike, Sali Berisha, ka dalë në mbrojtje të Erion Veliajt, duke akuzuar kryeministrin Edi Rama se qëndron pas transferimit të tij në burgun e Fierit, nga frika e humbjes së Bashkisë së Tiranës.
Në një konferencë për mediat, Berisha e cilësoi transferimin e Veliajt si një veprim në kundërshtim me procedurat, ndërsa bëri thirrje për bashkimin e forcave opozitare me kandidatë të përbashkët në zgjedhjet e ardhshme vendore.
“Nuk ka dyshim se ai, me ndërhyrjen e fundit, me transferimin e tij në kundërshtim me të gjitha procedurat, është i gatshëm të ndërmarrë çdo akt ndaj tij nga frika se do të humbasë Bashkinë e Tiranës. Në qoftë se analizojmë këtë situatë, PD dhe partitë opozitare mendoj se kanë përgjegjësinë në betejën kundër kësaj të keqeje të madhe të bashkohen në këto zgjedhje vendore me kandidatë të përbashkët në një koalicion të gjerë në gjithë Shqipërinë, përfshirë edhe Tiranën”, deklaroi Berisha.
Kreu i PD-së përsëriti gjithashtu thirrjen për t'iu bashkuar protestës së studentëve të shtunën, pavarësisht se një javë më parë demokratët u refuzuan nga protestuesit, të cilët me thirrjet “Rama në burg, Berisha në burg” kanë shprehur kundërshtimin ndaj të dyja palëve politike.
Berisha theksoi se opozita është e hapur për bashkëpunim me të gjitha forcat politike dhe grupimet që kërkojnë largimin e Ramës, si në zgjedhje, ashtu edhe në protesta.
