Elvana Gjata ka përfunduar sërish në vendin e dytë në Festivalin e Këngës në RTSH, duke mos arritur të përfaqësojë Shqipërinë në Eurovizion. Artistja konkurronte këtë vit me këngën “Karnaval” në Fest 63, por çmimi i parë shkoi për “Shkodra Elektronike” me këngën “Zjerm”.
Pas shpalljes së rezultateve, Elvana iu drejtua fansave me një mesazh duke i falënderuar për mbështetjen dhe duke i ftuar të mos mërziten.
“Jeta më ka mësuar që 10 herë të bie, 11 herë do të ngrihem,” tha këngëtarja. “Mos harroni që jeta është një karnaval dhe asnjë lot nuk është final. Ju dua shumë!”
Kjo është hera e dytë që Elvana Gjata zë vendin e dytë në këtë festival. Kujtojmë se në Fest ‘58 ajo konkurroi me këngën “Me Tana”, por humbi përballë Arilena Arës me “Shaj”.
