Çmimet e hoteleve janë rritur ndjeshëm në disa prej qyteteve kryesore evropiane, ndërsa qindra mijëra turistë po udhëtojnë drejt kontinentit për të parë eklipsin e parë total diellor të dukshëm nga Evropa në këtë shekull. Reykjaviku, kryeqyteti i Islandës, ka regjistruar një nga rritjet më të mëdha të çmimeve të akomodimit. Qyteti është ndër destinacionet e pakta ku eklipsi i plotë mund të vëzhgohet para se të perëndojë dielli të mërkurën.
Sipas të dhënave të grupit të udhëtimeve dhe mikpritjes Lighthouse Intelligence, turistët kanë paguar mesatarisht 793 dollarë (587 paund) për një dhomë hoteli në Reykjavik për natën e së mërkurës. Kjo përfaqëson një rritje prej 98% krahasuar me të njëjtën ditë të vitit të kaluar.
Edhe Spanja po përgatitet për një fluks të madh vizitorësh, pasi konsiderohet një nga vendet më të mira në Evropë për të vëzhguar eklipsin total. Ministria e Financave e Spanjës deklaroi të hënën se pret që rreth 460,000 turistë të huaj të vizitojnë vendin posaçërisht për këtë ngjarje.
Në A Coruna, në veriperëndim të Spanjës, çmimi mesatar i një dhome hoteli është rritur me 135% krahasuar me vitin e kaluar, duke arritur në 451 dollarë. Në Majorka, ku eklipsi pritet të jetë i dukshëm pranë horizontit në perëndim të diellit, çmimet janë rritur me 24%, në rreth 448 dollarë.
Rritje të ndjeshme janë regjistruar edhe në Santiago de Compostela dhe Bilbao, ku çmimet e dhomave të hoteleve janë rritur përkatësisht me 34% dhe 67%.
Ndërkohë, akomodimet në qytetet e vogla dhe fshatrat përgjatë rrugës së eklipsit janë rezervuar prej muajsh. Edhe observatorët e improvizuar të ngritur nga entuziastët vendas kanë tërhequr shumë vizitorë.
Sipas raportimeve, disa udhëtarë amerikanë kanë përdorur edhe platformat e shkëmbimit të shtëpive për të gjetur akomodim në Castilla y León, një nga rajonet më të favorshme të Spanjës për të parë eklipsin.
Fluksi i jashtëzakonshëm i turistëve ka ngritur shqetësime te autoritetet spanjolle për rrezikun e zjarreve në pyje. Policia parashikon rreth 1.5 milionë udhëtime shtesë me automjete gjatë së mërkurës.
Autoritetet paralajmërojnë se kushtet jashtëzakonisht të thata mund të bëjnë që edhe një shkëndijë e vogël të shkaktojë zjarre të mëdha, ndërsa trafiku i rënduar mund të pengojë qasjen e automjeteve të emergjencës në zonat rurale.
Për të përballuar situatën, Spanja ka planifikuar një operacion të gjerë sigurie, ku do të angazhohen rreth 35,000 efektivë policie.
