Të paktën 59 persona kanë humbur jetën dhe më shumë se 100 të tjerë janë plagosur në një zjarr në një klub nate në Koçan, në Maqedoninë e Veriut, sipas Ministrisë së Brendshme.
Zjarri filloi gjatë një koncerti të grupit DNK, kur efektet piroteknike u ndezën brenda lokalit. Mediat e Maqedonisë së Veriut raportojnë se në mesin e viktimave në tragjedinë e Koçanit janë edhe 5 anëtarë e grupit muzikor DNK.
Bëhet fjalë për Filip Stefanovski, Gjorgi Gjorgiev, Sara Projkovska dhe Andrej Gjorgievski, 4 anëtarët e grupit muzikor DNK si dhe fotografi i grupit Aleksandar Efremov humbën jetën në tragjedinë e mbrëmshme në diskotekën PULS në Koçan.
Ministri i Brendshëm, Pance Toshkovski, deklaroi se zjarri filloi kur u aktivizuan fishekzjarret rreth orës 2:30 të mëngjesit dhe flakët shpërthyen në të gjithë lokalin. Shkëndijat goditën tavanin, i cili ishte bërë nga një material shumë i ndezshëm dhe zjarri u përhap. Sipas tij, tymi i dendur i mbyti disa nga viktimat dhe dogji të tjerët.
Drejt vendit të ngjarjes kanë shkuar në ndihmë me dhjetëra ambulanca nga Shkupi ndërkohë që u aktivizua për ndihmë edhe një helikopter i Ministrisë së Brendshme.
