Është mbyllur pas katër orësh protesta e studentëve në Serbi. Me mijëra qytetarë protestuan në Sheshin “Sllavija” të Beogradit, në protestën që mund të quhet historike për nga pjesëmarrja. Ministria e Brendshme e Serbisë vlerësoi se 107.000 njerëz kishin marrë pjesë në protestën e sotme.
Në protestë ka pasur edhe incidente e tensione, pasi grupi “i studentëve që duan të mësojnë” i cili konsiderohet si mburojë për presidentin Aleksandar Vuçi, kanë hedhur objekte dhe mjete piroteknike.
Megjithatë raportohet se gjithçka ndodhi brenda zonës së mbrojtur nga Policia.
Ndërkohë nuk munguan as mesazhet kundër regjimit të presidentit serb Aleksandar Vuçiç, por edhe kundër Milorad Dodik, presidentit të entitetit Republika Srpska të Bosnjë dhe Hercegovinës. Në një nga pankartat shkruhej “Dodik nuk është Republika Srpska, Vuçiç nuk është Serbia”.
