Situata vijon të jetë e rënduar në Pukë për shkak të zjarreve, ndërsa flakët kanë përfshirë disa zona dhe janë afruar pranë banesave. Më problematike paraqitet situata në aksin Gojan-Gjegjan-Tërbun, ku janë angazhuar 255 forca dhe 11 mjete zjarrfikëse.
Zjarri vijon të jetë aktiv në drejtim të Gojanit të Vogël dhe zonës së Prozhemit, ndërsa në lagjen Pepaj, në Gojan të Madh, flakët janë afruar pranë banesave. Deri tani raportohet se janë djegur katër banesa të pabanuara, ndërsa një tjetër banesë e banuar, e cila ishte në rrezik, është shpëtuar nga ndërhyrja e forcave në terren.
Për mbrojtjen e banesave janë dislokuar pesë mjete zjarrfikëse dhe rreth 30 efektivë të Forcave të Armatosura. Ndërkohë, operacioni për shuarjen e flakëve vijon edhe nga ajri, me angazhimin e një helikopteri. Dhjetëra banorë janë evakuar nga zonat e rrezikuara, ndërsa forcat në terren vijojnë përpjekjet për të vënë nën kontroll vatrat e zjarrit.
