Një zjarr i përmasave të mëdha ka përfshirë vendgrumbullimin e mbetjeve në lagjen Myq-Mamëz të qytetit të Kukësit, në orët e para të mëngjesit të sotëm. Pavarësisht ndërhyrjes së menjëhershme të zjarrfikësve, të cilët kanë punuar pa ndërprerje gjatë gjithë natës, flakët vijojnë të jenë aktive dhe nuk janë vënë ende nën kontroll.
Shtëllungat e dendura të tymit janë përhapur në drejtim të zonave të banuara, duke krijuar shqetësim të madh mes banorëve për shkak të ndotjes së ajrit dhe rrezikut për shëndetin publik.
Ky është rasti i tretë brenda tre viteve që fusha e mbetjeve në Kukës përfshihet nga zjarri, çka ka ngritur shqetësime serioze mbi mënyrën e menaxhimit të mbetjeve dhe masat parandaluese që duhet të merren nga autoritetet.
Zjarri është përhapur me shpejtësi në një perimetër të gjerë, duke ushqyer dyshimet për një zjarrvënie të qëllimshme. Deri më tani, autoritetet lokale nuk kanë reaguar me një deklaratë zyrtare, ndërsa pritet të nisë një hetim për të përcaktuar shkakun e saktë të zjarrit dhe për të identifikuar përgjegjësit.
