Zgjedhjet që po mbahen sot në Serbi kanë shkaktuar fluks të shtuar të automjeteve dhe rradhë të gjata në disa pika të kalimit kufitar ndërmjet Kosovës dhe Serbisë. Qytetarët që po udhëtojnë drejt Serbisë për të marrë pjesë në procesin e votimit po përballen me pritje të gjata, të cilat në disa vendkalime arrijnë deri në tri orë.
Sipas të dhënave të publikuara nga Qendra Kombëtare për Menaxhim Kufitar, në disa pika kufitare pritjet për automjetet në hyrje të Kosovës arrijnë deri në 30–40 minuta, ndërsa në dalje raportohen pritje prej 90 deri në 120 minutash.
Situatë e rënduar është regjistruar në pikën kufitare në Merdar, ku pritjet për të dalë nga Kosova arrijnë nga një orë e gjysmë deri në dy orë. Në këtë vendkalim, kolona e automjeteve ka arritur në rreth tre kilometra gjatësi.
Ndërkohë, gjendja paraqitet edhe më e rënduar në pikën kufitare në Jarinjë, ku qytetarët po presin deri në tri orë për të kaluar drejt territorit të Serbisë.
Përveç vështirësive në qarkullimin kufitar, fluks i madh qytetarësh është raportuar edhe në Rashkë të Serbisë, ku po votojnë qytetarë nga veriu i Kosovës.
