Presidenti i Serbisë, Aleksandar Vuçiç, ka njoftuar se do të japë dorëheqjen nga posti më 25 ose 26 shtator, menjëherë pas kthimit nga Nju Jorku, për t’iu bashkuar fushatës për zgjedhjet e parakohshme parlamentare si qytetar i thjeshtë.
Vuçiç deklaroi se ligji nuk e detyron të largohet nga posti përpara se të përfshihet në fushatë, por theksoi se nuk dëshiron të garojë për postin e kryeministrit ndërkohë që ushtron funksionin e presidentit të Serbisë.
“Sapo të kthehem nga Nju Jorku do të jap dorëheqjen. Mendoj se do të jetë më 25 ose 26 shtator. Atëherë do të hyj në fushatë si qytetar i zakonshëm”, deklaroi Vuçiç, sipas agjencisë serbe Tanjug.
Njoftimi vjen vetëm dy ditë pasi Vuçiç firmosi dekretin për shpërndarjen e Asamblesë Kombëtare dhe shpalli zgjedhjet e parakohshme parlamentare për 25 tetor. Vendimi për zgjedhje të parakohshme erdhi pas propozimit të qeverisë serbe për shpërndarjen e Parlamentit.
Partia Progresive Serbe (SNS) ka vendosur ndërkohë që Vuçiç të jetë drejtuesi i listës “Aleksandar Vuçiç – Serbia e Bashkuar” dhe kandidati i saj për kryeministër.
Nëse realizohet dorëheqja e paralajmëruar, Vuçiç do të largohet nga Presidenca për t’u përfshirë drejtpërdrejt në betejën për drejtimin e qeverisë, duke synuar rikthimin në postin e kryeministrit, të cilin e ka mbajtur edhe më parë.
Zgjedhjet e 25 tetorit zhvillohen në një klimë të fortë tensioni politik në Serbi. Vendi është përballur prej afro dy vitesh me protesta të mëdha, të udhëhequra kryesisht nga studentët, pas shembjes së strehës së stacionit hekurudhor në Novi Sad në nëntor 2024, ku humbën jetën 16 persona.
