Florind Shabani, rrezikon një dënim me 21 vite burgim për vrasjen e ish-policit Roland Rexhepi, i njohur si “Doda”.
Prokuroria e Elbasanit shpalli pretencën për të pandehurin, i cili u përball me drejtësinë pas ekstradimin nga Gjermania.
Më herët, për atentatin mafioz ndaj Dodës është dënuar me 24 vite burgim Armando Llakaj dhe me 23 vite burgim Marjus Tafa.
Autori i katërt i dyshuar që mori pjesë në krimin e rëndë të ndodhur në 15 vite me parë, është Donald Hoxha, i cili u ekstradua pak ditë më parë nga Britania e Madhe.
Roland Rexhepi u ekzekutua me 22 korrik 2009, në lagjen Vullnetari në Elbasan, pranë banesës së tij, teksa po shkonte tek parking për të marrë makinën. Ish efektivi u qëllua me breshëri kallashnikovi në syrin e shumë dëshmitarëve. Për vrasjen e Dodës, fillimisht u dyshua Bledar Muça një prej njerëzve më të besuar të grupit criminal Çapja, por asnjëherë ndaj tij nuk u ngrit akuzë zyrtare. Bledar Muça do të ekzekutohej dy vite më parë në Belgjikë. Pavarësisht se prokuroria ka mundur të identifikojë autorët e vrasjes së policit, nuk ka mundur ende të zbulojë se kush e urdhëroi dhe financoi ekzekutimin mafioz të Dodës.
Pas vrasjes së Roland Rexhepit, në Elbasan dy vite më vonë, në dhjetor të 2011 u ekzekutua edhe vëllai i tij, Ilir Rexhepi.
